老婆餅．生日餅

4月26日是 Honey 生日，本想做一個蛋糕給他，在網上尋尋覓覓，遊 blog 時看見幾位博客都做了老婆餅，資料又詳盡，攪到我心郁郁都想試下，之前學西餅時學左幾堂搓牛油酥皮，今次做中式酥皮，相信也不難掛?  其實家中都有幾本食譜教做中式餅食，其中一本是江獻珠所編寫的 "點心 II"，當中亦有詳盡圖片介紹如何搓水油皮，另一本是 "自家製PARTY 美食小蛋糕"，加埋其他博客的示範， 今次可以的起心肝做老婆餅喇。

老公，呢個係老婆親手焗製的 "老婆．餅"，食左佢你要聽聽話話 (嘻嘻 ~ 其實你已經好聽話)，又大一歲喇，祝你身體健健康康!

 

食譜份量參考自 sandy, 靚媽咪，Charles Ho 的自家製Party美食小蛋糕及江獻珠食譜 (北方酥皮)

份量 : 約十個

(A) 水油皮材料 :   低筋麵粉 100克、 豬油 25克、水 42克

# 全部材料搓揉勻放雪柜鬆弛15分鐘，取出分10等份滾圓 (@16-17g)

(B) 油酥皮材料：低筋麵粉 85克、豬油 42克

# 全部材料搓勻放雪櫃雪硬，取出分10等份搓圓 (@12g-13g)

(C) 餡料材料：  糖冬瓜 60克、熟糕粉 50克、砂糖  50克、雲呢拿香油2滴、固體菜油  10克、水 85克

# 糖冬瓜用水洗去糖份，用布抹乾切碎成蓉，然後與其他材料拌勻，分十份每粒大約25克搓圓

做法 ：

1. 取一份水油皮 (A)，用掌心按平成圓形，將一份油酥皮 (B) 搓成粒狀，放在水油皮的中央，四週摺成一小圓包，

 

2. 用雙掌將小包麵團搓成長條，長度約 8 X 1-1/2 cm，

 

3. 平放麵條在案上，以麵杖擀薄成一長條，約 30 x 3 cm，愈薄愈好，(此處留意不可灑太多手粉在麵團上，要掃走多餘的麵粉，否則焗出來的酥皮會乾硬)

 

4. 從上向下將麵條卷起成一小卷，壓平小卷，從中間位置兩頭擀開，再擀成薄片，多卷一次便可使用，

 

5. 將麵卷頭尾兩端壓平，覆上兩端 (頭尾向中間覆上)，擀薄成圓皮，

 

6. 罝一份餡料於酥皮中央， 包起成球，收口向下，按平酥包，

 

7. 將老婆餅放上焗盤，掃上蛋黃液並以小刀在中央平衡介兩小刀，以200度焗20-22分鐘至金黃色。

 

 

 

 

 

 

皮很酥啊 ~ ~ ~

 

滷水牛展@智能煲

在台灣的家樂褔買了滷水包回來，一袋9個小包，在台灣滷水食物真是很受歡迎。 今次買了2條巴西金錢牛展，又係智能煲發揮小宇宙的時間喇

材料 :

急凍巴西金錢牛展   2條  (要揀幼身，扁身的才是金錢展)

淘大滷水汁    1枝

清水                1枝

滷水包            1個

 

做法 :

將牛展洗淨抹乾水份，放入智能煲內，加入滷水汁、清水及滷水包，蓋上蓋調較時間掣 30分鐘，完成後待氣閥自動下墮後便可取出切片。

 

配汁 :

白醋    3湯匙

清水    1湯匙

砂糖    1湯匙

蒜茸    1茶匙

紅辣椒  1隻切碎

以上材料混合，用來醮牛展吃很好味啊 !

釀節瓜甫@智能煲

家陣百物騰貴，每天在外午膳也不便宜，放完復活節假之後，幾家常去的食堂都加了價，一個午餐加2蚊，差不多 8%，但人工又冇加，真係要諗諗辦法至得。 唯有勤力啲帶飯返公司喇。

放工返屋企，回到家又是九秒九煮晚飯的競賽時間。 要煮一些 "叮" 翻熱都好味的餸菜，首選炆的菜式，但係返到屋企都七點鐘，點整得切?  智能煲又幫到我手 ! 佢唔係只是煲湯好，蒸 & 炆的菜式也十分快捷，今日做了釀節瓜甫，有瓜有肉營養豐富，又易整，煮飯無難度 !

材料 :

節瓜  2-3隻 (揀均勻幼身，摸上手感覺有絨毛拮手的最新鮮)

攪碎豬肉    10蚊

瑤柱絲       2-3茶匙

 

醃料 :

鹽、糖、生粉 各半茶匙

生抽、胡月粉少許

 

另備 :

1. 清雞湯   3/4碗  (如無清雞湯，可改清水加半茶匙雞粉)

2. 生粉水  (埋芡用)

 

做法 :

1.  攪碎豬肉加入醃料及2茶匙瑤柱絲一起攪拌

2. 節瓜刮去表皮，洗淨抹乾水份，切成半吋厚片，用小匙刮去中間部份成窩形

3. 用紙巾印去節瓜表面水份，沾上少許生粉 (可以排好一次過沾上生粉)

4. 將豬肉釀在節瓜上，(豬肉不要太厚)，再在表面加上瑤柱碎

5. 將釀好的節瓜甫鋪平在智能煲內，如太多可以放2層 (我共做了 18件，12個在底層，6個放面)

6. 將清雞湯放入煲內，蓋上蓋子，調較時間掣 3 分鐘 (如不想節瓜太腍可以較 2分鐘)，等待氣閥自然墮下

7. 開蓋喇 ~ ~ 將瓜甫取出 (要用湯匙幫手唷)，湯汁留在鍋中，按下1 分鐘再次加熱 (不用加蓋) 倒入生粉水埋芡，淋在節瓜甫上便完成。

呢個就係我明天的午餐喇 !

 

很難得的合照唷!

數一數碧碧&細細來了我家都6年多了，雖然是同一胎兩姊妹，可是牠們從不黏在一起，各自各有自己的世界。人家的貓貓啊，天氣冷會擁抱一起睡，但牠兩從不會。

今天是什麼好日子，牠們既然一起站在只有一尺乘一尺的抽濕機頂上，又有幸給囡囡拍下照片，真係開心到不得了 !  

 

瑞芳。菁桐。平溪。十分 (3)

由菁桐沿著火車軌步行了半小時到達了平溪火車站，

在此處又是尋找好味小食的地方，第一站食尚玩家推介"黑毛豬香腸"，又是加了價，NT 30，但對面另一檔子只是 NT 25，而且 SIZE 大好多，不過我地都係買左呢檔，賣點是黑豬肉加了高粱酒，香好多，可以加蒜片、青芥辣，沙拉醬等等，任君選擇。 我地試左原味 (即係乜都唔加) 。

另一檔要試的係 "紅龜麵店"，推介是板條 (即係河粉)、沙茶乾麵、頭骨肉 。

在平溪裡有一小段路軌是在架空橋上，平日天氣好是有很多人在上便行來行去，但當日不停下雨，所以沒有人行了 (其實有警告牌立在此處不準人行入去嫁 !)，唯有影張相 ~ 到此一遊。

平溪比較細，只是一條小街，於是我地搭火車去十分食午餐。

我地揀左出名的 "十分寮客棧"

主力推介菜式，

1. 箭筍 ~ 筷子咁幼，咬下去清脆無比，是每桌必點之菜式，唔係度度有得食。

2. 白斬土雞 ~ 皮薄肉厚，一點兒皮下脂肪也沒有，而且雞皮爽脆，一點也油膩感覺也沒有，又是推介之選。 

3. 由於我們只有兩個人，之前又吃了很多小吃，所以只是加點了一個蛤蜊湯，但你也不要小看它，湯水入口非常清甜，好有薑味，蜆肉大大隻，清清地又可解喝，正 !

此處還有推介是酥炸溪蝦，酥炸溪哥 (即炸溪魚)，細細隻，炸得通透連骨和蝦殼都可以吃。不過我地不想浪費食物，所以沒有點，希望下次可以同一大班朋友來食。

街外有台灣的小朋友在寫願望在天燈上，"減肥成功" !

食完飯行左靜安吊橋，可惜天雨路滑，不小心在此處跌了一跤，手心及膝蓋都瘀黑了。於是提早回台北，今日十分旅程就此結束~