試新野~安記濃湯雞煲翅

買左一罐安記的濃湯雞煲翅，今晚試左味，即刻報告比大家知 !

問過安記門市的姐姐，此湯味道香濃，開罐後可以加一小碗水一起加熱，佢地話湯水份量可以有3-4人飲用。

招紙上寫明有原隻雞、有魚翅，夠竟隻雞有幾大隻呢??

魚翅有80克，好....註明清楚，願者上釣....哈哈哈!!

開罐一看，只有九成滿，湯面有很多油，但雞湯味非常香濃，

分開左湯和料，裡面真係有一隻雞、魚翅、火腿粒、元貝粒，果然真材實料!

夠竟隻雞有幾大隻.....揭開比大家知喇~
其實是一隻春雞，SIZE比手掌心大少少，大家可以睇下下面的實物對比，
我諗呢隻春雞十多日大吧.....法國春雞也是差不多SIZE呢~

加熱之後湯味非常香濃，原罐飲用比較咸，我加左一飯碗水，湯味啱啱好。

魚翅是一梳梳的，沒有散開，很軟滑，味道不錯，不過一罐價錢就貴左啲，試左一次就算囉~

與大閘蟹戰鬥!

繼中秋節食月餅之後，又到左食大閘蟹的季節。

我地一家人一向不太喜好有殼的食物，蟹亦非我家人所好，
不過如果免費有得食，出點力也無所謂!
 
話說上星期日收到細佬來電通知有新鮮大閘蟹由江蘇坐火車運到，佢話送兩隻比我食，不過問題是啲蟹全部未綁繩，要諗諗計點攪?  身為家姐的我，又要發揮我的小宇宙，於是我在家中找來尼龍繩、膠手套，出發去媽媽屋企綁蟹囉~

新鮮的大閘蟹，一個網袋有20隻呀，點算好呀!!!!!

乖乖地啦，唔好玩口水啦!!!

先按住佢個身體，

將八隻爪收好，然後收好雙蟹鉗，




用盡九牛二虎之力將佢綁住，我成身出晒汗，好驚佢鉗我，
不過綁左幾隻之後已經熟手，好快攪掂。

 


未食先放入雪櫃雪住佢......
我分左4隻，媽媽分左5隻，

 

爸爸話係黃毛金爪，好野呢嘅!  

每隻有四兩重喎，

好乾淨，蟹身無泥，不過仍要用牙刷同佢地沖沖涼、擦擦身，
沖乾淨積存的泥，咁就食得安心咧。
 

 


媽媽幫我地係藥材舖買左紫蘇葉，5蚊一兩有好多片，用幾片就夠咧~ 
再加十片薑左右，

 

先將紫蘇葉、薑片、水一起煮沸，
再滾幾分鐘至聞到紫蘇葉及薑片的香味，熄火，放入蒸餸架，

 


將蟹肚向上置在蒸架上，中火蒸20分鐘即可。

 

 

在蒸蟹的同時，開始預備大閘蟹醋，用鎮江醋、紅糖、薑米調製。
我比較愛吃甜味重一點的醋，所以下了較多糖，大家可依個人口味逐少加糖調較合適口味。

 

上碟喇~

滑滑又甘香的蟹膏，好好味啊~ ........

細佬.....你幾時再有蟹要綁啊....呵呵....隨時call我，報酬要幾隻蟹就得喇~~

 

yahoo blog 超唔掂呀!!!!!!

yahoo blog upgrade 左之後超唔掂! 激死人! 成日upload 唔到相片，相出新post 都好困難，唔通佢地真係想趕客戶走!!!!!!!