清湯牛腩@Staub

又來炆牛腩，今之用左加拿大牛腩條，因為去唔到街市買新鮮的崩沙腩，唯有用牛腩條代替，下一次一定要去肉檔買崩沙腩，同事說好食好多呢 ~

用 Staub 來試下炆牛腩的效果，只用細火炆了一小時已經腍了。白蘿蔔分開用另一個鍋子煮熟，吃的時候才將兩者混合一起煮一會，加上中芹、大蒜及蔥段焗一會，一鍋熱辣辣的清湯牛腩煲可以上桌喔 ! 好食到唔停得口 ~

 

材料 :

加拿大牛腩條   1 kg

自家製香料包一個，香葉 3片，薑 3-4片

香料包入面有 : 八角 3粒 / 花椒 1茶匙 / 荳蔻 1粒 ，用茶葉袋入好

1. 先將牛腩條解凍，汆水 10分鐘，將所有浮泡沖走

2. 將已汆水的牛腩條 / 香草包 / 香葉及薑片放入鍋子中，水加滿蓋至牛腩面，先用中火煲滾，再轉小火炆煮一小時或牛腩腍便可 (每半小時熄火燜15分鐘，重覆2次，可令牛腩更易煮腍)

炆好的牛腩有很多油，此時可將牛腩及湯分開，隔去油份，留起清湯備用

3. 白蘿蔔去皮洗乾淨，切大件。取另一鍋子，放入白蘿蔔、冰糖一小粒 (將6-8克)、清雞湯加至蓋面 (如無清雞湯，可用雞粉1茶匙加水代替)。小火炆煮半小時或腍。留起所有蘿蔔湯備用。

4. 將已炆好的白蘿白墊底，牛腩切件鋪上，加入牛腩清湯及蘿白湯 (份量隨意)，用中火煮滾5分鐘，加入鹽調味

5. 最後加入中芹、大蒜、蔥段焗一焗有香味浸出便成 。

p.s - 牛腩可以炆多一點，記得留起所有牛腩湯 (隔油後放入容器)，一起放入冰箱冷藏，下次食的時候取出解凍，再炆一鍋蘿蔔加上去便可，可以慳能源、慳時間、十分適合我地呢班在職師奶