蔥沖班腩煲@Staub

中毒 ... 中毒 .... 今次真係中晒毒 .... 薑蔥班腩煲...唔通啲斑腩有雪茄毒 ?

大家唔使擔心，我唔係中雪茄毒 ! 一睇就知係中左 Staub 的毒 ! 

而且中毒非常深，已經去到每晚煮餸一定要用佢，就連去街市買餸，都會諗一啲可以用 Staub 去烹調的餸菜，家陣我連清炒芽菜都用佢煮  。

在旺角街市見到有生劏大龍躉，考慮左好耐，又想食腩.....又想食班球....最後買了魚肉做班球，魚販切了一片，秤一秤....14兩.....噢 !....銀包入面游走了一條紅衫魚及兩隻青蟹添  成為 $120 大元 !  快快手還買了豆卜、炸枝竹、青蔥，返屋企煮飯 lu ~ ~

調味汁料 : 

生抽  2湯匙 \ 老抽  1湯匙 \ 砂糖 2茶匙 \ 雞粉 半茶匙 \ 水 250 ml

料頭  : 大量薑片，紅蔥頭、蒜頭、蔥白、蔥段 (最後下)

另外預備紹酒少許 (灒酒) 或任何廚酒都得，24cm Staub 圓鍋一個，

雞蛋一隻，生粉 (炸魚用)

*********************************************************

做法 :

1. 先將魚洗抹乾水份，切大片，加入半茶匙鹽、胡椒粉少許、1湯匙蛋汁醃十分鐘

2. 燒熱 Staub 鑄鐵鍋，燒熱半杯油，魚塊沾上生粉，下油鍋用半煎炸方式炸至金黃色

(不用炸至全熟，表面硬身便可，約8成熟)，盛起備用

3. 倒起所有炸油，留下約2湯匙炸油在鍋子中，下料頭爆香。

4. 加入魚塊，在鍋邊灒酒

5. 灒酒後，加入豆卜及板竹，下調味汁料，蓋上鍋蓋炆煮 5分鐘，

6. 5分鐘後下蔥段，炒勻埋芡便完成，

整鍋上桌，熱辣辣好惹味，加上一碗熱辣辣的白飯，一家三口食到唔停口。 

p.s. - 下次再煮要下多 1-2倍的料頭，今次唔係好夠。