夏日涼拌 ~ 蕃茄蛋拌麵

夏天無胃口 ? 

來一客「蕃茄蛋拌麵」 ~ 酸酸甜甜好醒胃，素食者又o岩，減肥更o岩 key !

另外加入了雲耳，除了爽口之外，還有藥膳的攻效，大朋友小朋友在日常飲食中加入有益身體的食材，可收保健之效。

雲耳 - 性味甘平，歸胃、大腸經，有涼血止血的功效，對於咳血、痔血、便秘等症均有良效。多食木耳、雲耳，除了有助於降低血脂肪、通血管，更可改善心血管疾病。

 

只要煮好個主角「蕃茄蛋」，你可以撈麵又得、撈飯又得、長通粉、通心粉、韓式年糕....撈乜都得 !  今日我揀左韓國烏冬，麵質好彈牙。

但係要點先可以keep 住個蕃茄蛋好味，我個秘訣就係用罐頭蕃茄喇 ! 唔好以為罐頭無好嘢，其實茶餐廳，甚至大廚 Jamie Oliver，都成有用罐頭蕃茄，Jamie 都話佢好放便   。今日係吉吉島就可以買齊材料，放工先去買材料都唔遲。

材料 : (3人份量)

新鮮蕃茄   1個

罐頭蕃茄粒   1罐

雞蛋  3隻

雲耳  適量

韓國烏冬 3個

調味料 :  糖 3-4茶匙   鹽半茶匙  雞粉 1/3茶匙  茄汁 1湯匙  清水半碗

 

做法:

1) 新鮮蕃茄切粒，雲耳用水浸軟，切去底部硬粒備用

2) 雞蛋拂勻，燒熱油鑊，倒入 1/3份量的蛋汁煎成蛋皮 (有少少焦會香口啲)，盛起，再重覆完成餘下2塊蛋皮，然後將蛋皮切成大塊狀備用。

3) 下蕃茄粒略炒，然後下罐頭蕃茄及雲耳，加入調味料煮10分鐘

4) 下雞蛋，煮至汁濃即可

5) 烏冬用滾水燙熟，過冷河 (我用冰水浸一會，這才有涼麵的效果啊...呵呵)

6) 淋上蕃茄蛋就可以開餐喇  >o<