我家沒有電飯煲? ~

現代家庭廚房必備有的家庭小電器 - 電飯煲 !

可是...我家沒有電飯煲啊 !

大大話話都已經有六年無買電飯煲囉 !  無他嘅....因為揀唔啱囉。  印象中最後一個是日本牌子的快思邏輯電飯煲，可惜煲飯速度一點也不快速，2碗飯要煲一個小時才有得食，真是慢到嘔，皆因日本人對食飯有要求，米加水後要用溫水浸半小時，然後才烹煮，出來的白飯才好吃，就是因為呢個原因，將個飯煲設計成按掣後先浸米30分鐘後才煲，攪足一個鐘才有飯食 !  加上煲底花左又黏底，最後都冇再買電飯煲囉。

冇左電飯煲之後，我就買左菲姐個壓力煲，加埋蒸鍋便可以蒸飯蒸餸，方法好簡單，水滾後氣閥鎖上計5分鐘後熄火，讓氣閥自然下墜，約15分鐘後便煮好白飯。

由於去年底廚房換左用電磁爐，壓力煲用唔到，於是又研究用其他鍋具煲飯，之前都有寫過一篇blog有關用鑄鐵鍋煲白飯的比較，
大家可以參考下 :  Le Creuset vs Staub@白飯篇

不過用鑄鐵鍋只可以煲白飯，無左蒸餸的功能，而且只餘下另一個爐頭來煮餸，對於在職主婦來說，放工回家已是晚上七點幾，好想快手煮好晚飯，如果可以飯餸一齊蒸，時間快左效率高，最重要是可以節省能源，在現今講求環保的大氣候下，真是一舉兩得。

買電磁爐時送了一個8公升的湯煲，正好夠大用來蒸飯蒸餸。

其實蒸飯一點也不難，份量很易控制，米與水的比例是 1 : 1，即是1杯米量杯米，加1米量杯熱水 (注意蒸飯是要下熱水)，水滾後中火蒸20分鐘，便有兩碗白飯，很易吧 !  想軟腍點便多加少少水。

 
 

我用樂聲牌電磁爐，如果只是蒸白飯，我會用4度火力，如果是飯餸一齊蒸，我會用5度火力。
電費計算 : 4度火是500W耗電量，用一小時電費 $0.50，蒸飯用20分鐘，電費是 $0.167，好慳 !

 

放上一孖臘腸一齊蒸又得。



加上蒸架，冬菜蒸豬肉，飯餸一齊上桌。

 

又或者一邊爐頭蒸飯+蒜頭豆豉蒸排骨，set 時間20分鐘，另一邊爐頭整鹽油水煮大眼雞魚 (12分鐘)，炒莧菜 (5分鐘)，真係20分鐘煮好晒所有餸 !