多年來買下不少廚具,有菲姐的快鍋、高速煲、Kenwood 的 Mixer、娥姐的智能煲,它們都幫我不少忙,現今世界講求低炭生活,煮食都要慳能源之餘也要快速,以配合我地呢班在職主婦。
買這些廚具時都各自跟了一本食譜,雖然入面介紹的菜式未必人人合意,但偶爾看一看也可給我不少靈感。 之前做了餈飯,留起了一點糯米,就是為了要試一試菲姐食譜教授的 "珍味丸子",今次還出動了 KM020 及 智能煲一起幫手,配合得宜,備好丸子放入智能煲,唔使睇火夠鐘就食得。
【材料】
免治豬肉 半斤 (300克)
冬菇 4隻 (浸軟切粒)
蝦米 1湯匙 (浸軟切粒,留水半碗備用)
馬蹄 3粒 (去皮拍扁切碎)
糯米 1杯 (200克,浸水一晚)
【醃料】
鹽 3/4茶匙
糖 3/4茶匙
生抽 2茶匙
油 2茶匙
胡椒粉 少許
生粉 1-1/2湯匙
【做法】
1. 除糯米外,先將材料及醃料混合攪至起膠
(我用 KM020,先將豬肉及醃料放入 MIXING BOWL 用中速攪2分鐘,加2次加入蝦米水攪勻,後加入冬菇粒、馬蹄粒及蝦米粒用快速打至起膠)
2. 用手擠出丸子型,滾上糯米
3. 將丸子放入蒸盤準備蒸。由於此份量共做了 19個丸子,所以我用竹笪加多一層在上面,咁就可以一次過蒸,慳便又快捷,加 1湯匙水在丸子上,因豬肉沒有太多水份,加一點水可幫助產生蒸氣令糯米軟身些。
4. 智能鍋調較 20分鐘,完成後待氣閥自己落下便完成
你好勁呀! 這個係心機餸!!!
回覆刪除[沙朗回覆01/12/2012 17:47:31]嘩...... 咁正! 年廿五就開始放, 你公司好好喎!
[版主回覆01/12/2012 17:39:58]我老公只係放紅色假期, 我地公司下星期三都開始放假, 佢幫唔到我大掃除, 唯有分開多日做喇,
[沙朗回覆01/11/2012 23:17:26]好勁呀你...... 可以百足咁多爪, 整咁多野! 做你屋企人就幸福啦!
我諗新年前我都整唔倒糕架喇, 星期六日都好忙, 而且要返到年廿八先放....... 可能, 係假期中會整! wakakaka.......因為我年初九先返工呀!
[版主回覆01/11/2012 20:25:03]今日整左蘿白糕, 不過食晒都未過年, 下星期會整桂花馬蹄糕, 星期尾又話會下雨, 我都未抹窗...嘻嘻..好多野都未做...
[沙朗回覆01/11/2012 16:53:33]我好想整架! 蘿蔔糕係我的至愛!!! 但未有時間整..... 希望可以整倒啦!
[版主回覆01/11/2012 15:13:45]你太過獎喇~ 我都只是跟食譜做已而。 快過年了, 近日又忙於做蘿蔔糕、馬蹄糕及芋頭糕,係呢, 你有冇做糕點過年呢?