今日跟蘋果日報食譜做的第二擊 「湛江鹹香雞」。湛江的鹹香雞並不只是加鹽那麼簡單，原來要先用好多配料來做個高湯，還加了火腿茸、蝦米茸和大量香料去煮，風味獨特。話易唔易，話難唔難，摷摷下原來家中差不多有齊所有配料，只要買隻新鮮雞便可以動手喇 !
原食譜寫要用約2斤半重的雞，但係對我來講太大隻了，一餐食唔晒，我地又唔鍾意留隔夜餸，所以揀左呢隻在超市買的 「鬍鬚雞」，上面寫明是自然放養，約140天大，無黃色肥膏，瘦瘦地，秤一秤有 900克重 (即一斤半)，三個人食就最啱 !
原食譜材料 :
雞 1隻（約 2斤半）、葱 1棵（切絲）
配料：
金華火腿粒/蝦米茸各 1両、蒜頭 6粒（剁茸）、乾葱 3粒（剁茸）、薑 3片（切粒）
調味料：
清水 3公升、甘草 3片、草果 3粒、沙薑 6粒、香葉 10片、丁香 1粒、黃枝子 2粒、鹽 10両、雞粉 2湯匙、麥芽糖 1湯匙、玫瑰露酒 1湯匙、魚露 1湯匙
家中沒有甘草，沒有下，也沒有黃枝子，黃枝子用作染色，可不下。今次選用了 27cm Le creuset，容量 4.2 公升，浸雞啱啱好蓋過面。(清水改為 2.5公升，鹽改為 300克)
做法 :
1. 燒熱油，爆香薑粒、蒜茸、乾葱茸、火腿茸、蝦米茸、魚露、清水、沙薑、香葉、丁香、甘草、黃枝子、草果、鹽、雞粉、麥芽糖及玫瑰露酒，用慢火熬煮半小時，攪拌至鹽溶掉。
2. 把雞放入開中火煮滾，拿起雞頭，將雞拉出，讓雞肚內的水流出，這稱之為掟水，重複此動作 5次，然後熄火冚蓋，把雞留在汁裏浸半小時至浸熟。
又係豬頭炳出動的時間喇 ~ 用電磁爐keep住用一度火，用蝦眼水浸雞最正 !
3. 將雞取出，稍攤凉後斬件，再撒上葱絲及淋上煮雞汁即成。
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
食後感 : 真係好好味，雖然只是浸了 30分鐘，但非常入味，最正係雞胸肉，雞肶又滑，不過雞翼較薄身，鹹左啲啲，不過送飯一流 ~ 
我的另一款浸雞食譜 : http://hk.myblog.yahoo.com/aprilcat-home/article?mid=1464
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
萬里機構出版的《在家做燒味》於各大書店有售）
沒有留言:
張貼留言